Stória di Natal

Avizu di nasimentu di Juon

Lúkas

Kapítilu 1

Versíkulus 5 ti 25

 

5Kantu Eródis Grandi éra rei di Judea, tinha un saserdóti ki txomaba Zakaria, y e ta fazeba párti di un grupu di saserdótis di Abías. Se mudjer éra di familha di Aron y se nómi éra Zabel. 6Es dôs es ta viveba dretu dianti di Déus y es ta guardaba tudu mandamentu y lei di Sinhor. Ningen ka tinha nada pa pontaba es dédu. 7Es ka tinha fidju, pamódi Zabel ka podeba ten fidju y es dôs es staba bédju.

8Ta kontise ki Zakaria ba faze se trabadju di saserdóti dianti di Déus, pamódi na kel altura se grupu staba di sirbisu na Ténplu di Jeruzalen. 9Zakaria skodjedu pa sórti, sima éra kustumu entri es, skodjeba saserdótis pa entra na lugar santu di Ténplu di Sinhor, pa kema insénsu. 10Inkuantu e staba la déntu, na óra di kema insénsu, povu staba di ladu di fóra di lugar santu ta ora.

11Zakaria staba na lugar santu kantu dirapenti parse-l un anju di Sinhor, sakédu na direita di altar di insénsu. 12Kantu Zakaria odja-l, e fika spantadu, y korpu gurgunha-l di médu. 13Má anju fla-l: «Ka bu xinti médu Zakaria, pamódi Déus obi bu orason y bu mudjer Zabel ta da-u un fidju, y bu ta po-l nómi di Juon. 14Bu ta ba ten un grandi alegria ku se nasimentu, y txeu gentis ta fika kontenti djuntu ku bo. 15Odja! E ta ba ser un grandi ómi dianti di odju di Sinhor. E ka ta bebe nunka vinhu, nen bebida fórti. E ta ser xeiu di Spritu Santu, mézmu déntu di bariga di se mai. 16E ta ba poi txeu fidju di Izrael ta volta pa Sinhor se Déus. 17E ta bai frenti di Sinhor na Spritu y puder di pruféta Elías, pa faze volta kurason di mai ku pai pa ses fidjus y tanbe pa faze volta kes dizobidienti pa sabedoria di gentis justu, pa pripara un povu pa resebe Sinhor.»

18Zakaria purgunta anju: «Módi ki N pode ten sertéza des kuza? Ami é un ómi bédju, y nha mudjer tanbe.»

19Anju risponde-l, e fla-l: «Ami é Gabriel, inkaregadu di sirbisu di Déus. El ki manda-m pa N ben pâpia ku bo, pa N traze-u es bon notísia li. 20Má, pamódi bu ka kridita na nha palavra, bu ta fika mudu, bu ka ta pâpia ti kes kuza kontise, pamódi nha palavra ta kunpri na se ténpu sértu.»

21Kel povu sa ta speraba pa Zakaria parse, y es atxa stranhu sima e dura na lugar santu. 22Kantu e sai, e ka konsigi pâpia ku es y es intende ki e tevi un vizon na lugar santu. E pâpia ku es ku jéstu y e fika mudu.

23Kantu Zakaria kaba dias di se sirbisu, e bai pa se kaza. 24Dipos ki tudu es kuza kontise, se mudjer Zabel fika grávida y e fika déntu kaza duranti sinku męs. 25E fla: «Sinhor faze-m grandi kuza. E djobe na mi ku favor y dja da-m razon pa N xinti dretu dianti di tudu algen.»

 

Kontínua ku
(Lúkas 1:26-38)
Avizu di nasimentu di Jizus