Stória di Natal

Avizu di nasimentu di Jizus

Lúkas

Kapítilu 1

Versíkulus 26 ti 38

 

26Na sais mês di gravides di Zabel, Déus manda anju Gabriel ti vila di Nazaré, na zóna di Galilea, 27pa ba ter ku un vírjen, ki se nómi éra Maria, noiva di un ómi txomadu Juzé, di familha di rei Daví. 28Anju Gabriel txiga pértu di Maria, y e fla-l: «Fika kontenti minina, bo é filis! Déus sta ku bo.»

29Kantu Maria obi es palavra, e fika trapadjadu, y ta pensa: «Ki tipu di mantenha é kel-li?» 30Má anju fla-l:

«Maria, ka bu xinti médu;

    pamódi bo é filis dianti di Déus!

31Alê-bu ta ben fika grávida,

    bu ta ten un fidju

    y bu ta po-L nómi Jizus.

32E ta ser grandi.

    E ta txomadu Fidju di Déus

      ki sta di riba tudu.

Nhordés ta da-L

    tronu di Rei Daví, Se pai.

33E ta guverna pa sénpri

    disendentis di povu di Izrael.

Se guvernu ka ta kaba!»

34Anton Maria purgunta anju: «Módi ki N pode ten fidju? Ami é un minina vírjen!»

35Anju risponde-l: «Spritu Santu ta dixi riba bo, y puder di Déus, ki sta di riba tudu, ta kubri-u ku Se sónbra; pamódi Es ki sa ta ben nase é Santu, y E ta ser txomadu Fidju di Déus. 36Alâ Zabel bu parenti tanbe grávida na se bedjisa, ki é un mudjer ki gentis staba ta fla-fla ma e ka ta pariba, má e sta na sestu mês di gravides, 37pamódi ka ten nada ki Déus ka pode faze.»

38Anton, Maria risponde: «Alê-m li, ami é sérva di Sinhor. Pa kontise ku mi, sima bu palavra fla.» Dipos di kel-li, anju bai y e dexa-l.

 

Kotínua ku
(Lúkas 1:39-45)
Maria vizita Zabel